‘भाइरल गायिका’भन्छिन् – अब गीत रेकर्डिङ गर्छु

असोज ०५, २०७६  

धादिङ । निलकन्ठ नगरपालिका संकोष, धादिङकी कमला घिमिरे उमेरले भरखर ११ लागिन् । उनको चर्चा ब्यबसायिक लोक दोहोरी कलाकार भन्दा कम छैन । आफुलाई लोकदोहोरीमा अब्बल मान्ने धेरैलाई यी सानी गायिकाले दोहोरीमा हराउँदै आएकी छिन् ।

Advertisement

गत साता लोक दोहोरी गायक राजु परियारसँग यी गायिकाले लोक दोहोरी गानयमा प्रतिस्पर्धा गरिन् । आधा घन्टा भन्दा लामो समयको दोहोरीमा गायक राजु परियारलाई यी बाल गायिकाले आच्छु आच्छु पारिन् । दोहोरी खेल्दा उनी जस्तो गीतको पनि निकै कडा तुक्का फकाउने गर्छिन । यही कारण पनि उनी चर्चित भएकी हुन् ।

राजु परियार मात्र हैन, अहिले चर्चामा रहेको कैयौं लोक दोहोरी गायकहरुसँग यी बाल गायिकाले दोहोरी खेलिसकेकी छिन् । कतिपय गायकहरुलाई त यी गायिकाले दोहारीमा हराएकी छिन् ।

Advertisement

यी बालगायिका अहिले धादिङबेसीबाट नजिकै संकोष स्थित पशुपति माविमा कक्षा ६ मा पढ्छिन् । उनका दोहोरी गीतहरु राष्ट्रिय टेलिभिजनमा आउन थालेपछि उनी आफ्नो स्कुल मात्र हैन, देश बिदेशमै लोकप्रिय भएकी छिन् । स्कुलमा उनी सेलिब्रेटीको रुपमा चिनिएकी छिन् । अझ दिन दिनै कलाकार देखि पत्रकारहरु यी बालगायिकालाई भेट्न आउँदा कमलाको व्यस्तता बढेकोे छ ।

८ वर्षको उमेर देखि नै दोहोरी प्रतिस्पर्धामा उत्रेर धादिङमा चिनिएकी यी बालिकाले अझै आफ्नो स्वरमा गीत रेकर्ड गराउन सकेकी छिन् । पशुपति मावि संकोषका शिक्षक दीपक सिम्खडाका अनुसार बाल गायिका कमलाको आर्थिक अबस्था कमजोर छ । त्यसैले उनले आफ्नो पैसामा गीत रेकर्ड गराउन नसकेकी हुन् ।

‘उनलाई स्कुलले गीत रेकर्ड गराईदिन नसके पनि त्यो वातावरण मिलाई दिन्छ । अहिले थुप्रै गायक गायिकाहरुले कमलासँग गीत रेकर्ड गर्न चाहिरहेकोमा उत्कृष्ट गायकसँग कमलाको दोहोरी गीत रेकर्ड गराउने हाम्रो योजना छ ।’ शिक्षक सिम्खडाले भने,‘अहिले युट्युव च्यानल देखि राष्ट्रिय टेलिभिजनमा समेत कमला लोकप्रिय भएर उनको व्यस्तता बढ्दा हामीलाई खुसी लागेको छ । तर त्यतापट्टी बढी व्यस्त हुँदा कमलाको पढाई बिग्रने होकी भन्ने चिन्ता हामीलाई छ ।’

कमलाले आफ्नो गायनबाट लोकप्रियता हाँसिल गरेपछि उनलाई धादिङबेसी देखि काठमाडौंसम्मका नाम चलेको नीजि बिद्यालयले निशुल्क पढाउन र पालन पोषणको लागि प्रस्ताव गरेका छन् । तर आफु पशुपति माविमै पढ्ने र गायनसँगै पढाईमा पनि मेहनत गर्ने कमलाले राजधानीलाई बताईन् । अब आफुले चाँडै गीत रेकर्ड पनि गराउने यी बालगायिकाले बताएकी छिन् ।

प्रतिक्रिया दिनुहोस